Litli og stóri... Hilmir og Valtýr

Sumarhiti

2011-07-27T20:32:00.000+02:00

Þegar það er heitt... FUNheitt úti er ágætt að geta kælt sig niður í einkalauginni útá svölum ;)

Yngri og eldri útgáfan

2011-07-27T20:21:00.001+02:00

Jújú, enn og aftur er hægt að staðfesta bræðrerni þessara tveggja eintaka okkar. Þessi fjögur og hálft ár sem skilur þá félaga að fer óðum minnkandi þessa dagana. Þeir geta "leikið" "saman" (lesist: Hilmir stýrir honum í leik) en það er alveg merkilegt hvað Valtýr lætur ekki valta yfir sig. Skýr og greinileg orð hafa komið fram á leikstundum þeirra; "NEI!" og "HÆTTU!". Önnur orð eru svo : búnn (búin), apa (api á sænsku), titta (sjáðu), burrrr (bíll), atta! (akta/passa sig), bau (brauð), osss (ost), dah (drekka).

Í næstu viku verður Valtýr 18 mánaða, eins og hálfs árs markinu náð, og því fagnað með ferð á ungbarnaeftirlitið þar sem hann verður ástandsskoðaður og sprautaður í lærið. Læt vita af því þegar yfir er lokið ;)

Brothers from the same...

2011-06-18T20:22:00.001+02:00

Svo margt sem bræðir mann í heimi hér. Stór blá biðjandi augu eru eitt af þeim ;)

Náttúruuppgötvunarferð útí skógi...

2011-05-15T13:26:00.002+02:00

Í dag fórum við Hilmir í smá náttúruskoðunarferð með "Nyfiken Vild" útí skóg við Överjärva Gård. Börnin voru vopnuð kíkjum og fullorðna fólkið regnhlífum. Það nefnilega hellirigndi mestallan tímann en það þýddi bara að það var meira að sjá í ferðinni. Sníglarnir létu allavega ekkert bíða eftir sér !

Það var semsagt tekin 2 km göngutúr inní skóg, kíkt á snígla, blóm, fugla, maurabú og í lokin sest niður og borðað nesti saman. Ferlega gaman fyrir bæði börn og fullorðna, ekki spurning að við förum aftur í svona.

Hilmir með kíkirinn sinn. Keyptum okkur að sjálfsögðu svona til að eiga í bakpokanum í næstu nestisferð ;)

Leiðbeinandinn sýnir krökkunum snígil og útskýrir hvernig þeir tala saman með fálmurunum.

Valtýr og pabbi

2011-04-26T09:21:00.003+02:00

Alltaf gaman að bjóða fólki í kaffi. Sérstaklega þegar fólk á stóra og flotta myndavél og er áhugasamt um myndatökur ;)
Enn og aftur sannast það hversu gullfallegur drengurinn okkar litli er. Gullfallegur og pínu sposkur (sjá túngu í munnviki)..

Páskar í Stokkhólminum

2011-04-24T21:11:00.003+02:00

Páskahelgin hefur verið okkur ljúf hérna í Kronborgsgränd. Í gær, laugardag, fórum við öll familían á Etnografíska safnið þar sem við sátum úti á kaffihúsinu, löptum kaffi og ís og klöppuðum nýklektum kjúklingum. Hilmir er dýravinur mikill þannig að hann var yfir sig hamingjusamur að fá að halda á svona litlu og mjúku dýri í lófanum. Valtýr var með aðeins meiri efasemdir... þessi pípandi smádýr hræddu hann eiginlega þó honum fyndist spennandi að fylgjast með þeim þarna í kassanum.

Vor útá leikvelli

2011-04-15T19:58:00.002+02:00

Maður veit að vorið er komið þegar sólin skín langt frammað kvöldi og allir geta verið úti í flíspeysunni einni saman. Þvílíkt frelsi fyrir krakkana ! Á myndinni má sjá hluta af íslendinganýlendunni hérna í Ärvinge. Bakkabræðurnir Stangeland með Hilmari, jafnaldra og leikskólafélaga Hilmis.

Alltaf hægt að finna einhvað til að grallarast með og þarna voru þeir að fylla vasana af kastanjhnetum sem svo var hægt að nota til að rúlla niður nærliggjandi brekku. Metnaðarfullt með meiru.

Valtýr er búin að læra að renna sér sjálfur í rennibrautinni. Löng og ströng þjálfun að baki.

Á virkum dögum kl 16.30

2011-04-15T19:42:00.002+02:00

Þetta er staðalviðburður hér á heimilinu. Eftir leikskóla, þegar heim er komið og klukkan farin að nálgast hálffimm er "drekkutími". Uppáhald bræðranna er heimagerður smoothie. Ágætis leið til að fá oní þá ávexti og ab-mjólk. Hressandi ;)

Vælukjóinn

2011-04-15T11:44:00.002+02:00

Bugga amma kom eins og engill frá Íslandi og reddaði heimilisástandinu í heila viku meðan Ingó skrapp til Bandaríkjanna. Sem betur fer því akkúrat þessa viku ákvað Valtýr að fá sér fleiri tennur, næla sér í hita og verða úbersúpermömmusjúkur. Sannast á myndinni þar sem hann var slitin úr faðmi móður sinnar og í mjúkt ömmufang. Tók hann tvær sekúndur að fara yfirum af sorg. Svona leit hann semsagt út 75% af vikunni. Hann hætti að skæla meðan hann svaf. Þakka guði fyrir nærveru ömmumömmu. Annars hefði heimilið farið yfirum. Takk amma og sjáumst í sumar ;) p.s. Valtýr lofar að vera hressari næst.

Unglingurinn ?

2011-04-15T11:42:00.002+02:00

Hilmir er að verða dáldið unglingslegur finnst okkur. Bæði í fasi og útliti. Enda er hann nú skráður í hverfisskólann og farin að telja niður til ágústmánaðar þegar hann bæði verður 6 ára og sest svo á skólabekk tveim dögum seinna. Hann á vonandi eftir að rúlla skólanum um fingur sér. Kann alla stafina, er farin að staulast með að lesa stutt orð (þó hann reyni nú alltaf að gíska á restina eftir að hafa lesið fyrsta stafinn) og getur stafað nöfn án vandræða. Hann ætlar líka að verða lipur í stærðfræði því hann virðist geta lagt saman og dregið frá vandræðalaust í huganum. Í dag fékk hann sumarklippinguna sem sést á myndinni. Stutt og fínt. Hann grét söltum tárum í stólnum hjá klipparanum því hann vildi alls ekki missa "síða" hárið. En var tilneyddur því hann tók sig nefnilega til og klippti í burtu hálfan toppinn fyrir nokkrum vikum síðan. Eina lausnin var að fá allt jafnt. Jafn stutt !

Hversdagur með bræðrum

2011-03-23T19:44:00.001+01:00

Það er sjaldan lognmolla hérna á heimilinu með tvo einstaklinga undir sex ára aldri sem eru hvor öðrum frekari/ákveðnari og geta voða lítið (enn sem komið er allavega) leikið sér "saman".

Manni leiðist semsagt ekki. Og eflaust ekki þeim heldur !

Henke stórgóðvinur okkar sem er að leika hermann útí Kosovo sendi þeim bræðrum alvöru kamúflass heilgalla. Svo þeir geti nú týnst almennilega í skóginum hérna handan við hornið ;) Ekki er nú verra að skjöldurinn á gallanum er kyrfilega merktur íslensku KFOR (friðargæslu) sveitinni !

Valtýr horfir voða sjaldan á sjónvarpið. Hilmir þeim mun meira. Hann fær líka að hlusta á sjónvarpið með heyrnartólum svo að móðirin fari ekki yfirum af teiknimyndahljóðum.
Svo af og til vill Valtýr leggjast í fangið á einhverjum í sófanum og slaka aðeins á. Þá er ágætt að eiga stóbró sem situr þarna í rólegheitunum.

Og að lokum. Nei Hilmir er sko ekki að saga á bróður sínum hausinn. Þeir eru sko í hárgreiðsluleik ! Valtý finnst nefnilega óheyrilega gott að láta greiða á sér kollinn !

Sjálfsmynd

2011-03-23T19:40:00.000+01:00

Hilmir var fljótur að fatta sjálfsmyndatæknina. Spurning bara hvort hendurnar séu ekki nógu langar eða hann einfaldlega haft myndavélina aaaaðeins of nálægt andlitinu ;)

Uppátæki Valtýs

2011-03-05T17:06:00.002+01:00

Þegar maður er á 13. mánuði er maður búin að læra ýmislegt. Eftirfarandi myndir eru teknar undanfarinn mánuðinn.

Valtýr kann að klifra og troða sér. Svo vandlega að hann festist stundum !

Sogrörstæknin náðist loksins og það með miklum vinsældum. Nú fær aumingja Hilmir ekki að drekka neitt úr fernu nema Valtýr fái að smakka líka.

Hann er búin að átta sig á eigin (ó)stærð og að ef maður stendur ofaná einhverju hækkar maður um nokkra sentimetra.

Svo veit hann sko alveg hvað þetta rauða box með lokinu inniheldur ! Eiginlega ekkert sem hann nennir að tína upp í sig fyrir utan rúsínur.

Upprennandi sullari !

Fiðrilda (og fiska) heimsókn

2011-03-05T17:00:00.002+01:00

Einhvað þarf maður að finna sér skemmtilegt að gera þegar pabbinn stíngur af til München á sunnudagseftirmiðdegi ! Við strákarnir tókum okkur til og fórum saman á Fjärilshuset í Hagaparken. Langt síðan seinast. Svo langt að Hilmir var búin að steingleyma hvað var hægt að skoða þar. Fyrir utan fiðrildin eru þar japanskir koi-fiskar sem er hægt að skoða í ansi miklu návigi.. svo nánu að það er hægt að klappa þeim !

Veit ekki hvort Valtýr hafi fattað að þetta væri alvöru. Tölvualdarbarn. Eflaust bara risastór Ipad í hans augum.

Varúð ! Ekki fyrir viðkvæma !

2011-03-05T16:53:00.002+01:00

Leikskóladvöl Valtýs byrjuð og þar með líka allskyns veikindi; flesnur, flunsur, pestir... og svo langskemmtilegast af öllu; AUGNSÝKINGAR.

Held að svoleiðis toppi meira að segja leiðindaskalann langt frammyfir endalaust hor-í-nös.

Eftirfarandi mynd sýnir dæmi um augnsýkingu á degi 6. Vaknaði oftast einsog geimvera með augnlokin límd aftur. Restin af deginum fer svo í að þurrka í burtu það sem myndast jafnóðum.

Til að gera langa sögu stutta þá tók þetta ferli 2 vikur, 2 mismunandi augn-lyf og 3 heimsóknir á heilsugæsluna þar af sú síðasta þegar fór að blæða einhverstaðar úr öðru auganu (slímhúðinni, ekki augnu sjálfu).

Vona svo innilega innilega innilega að þessu sé þar með lokið í bili.

Afmælisstrákurinn !

2011-02-05T15:59:00.001+01:00

Valtýr Karl Stangeland orðin 1 árs. Heilt ár liðið síðan hann sá dagsljós í fyrsta sinn. Að sjálfsögðu var haldið uppá daginn hér í Kista. Bökuð vegleg barnvæn afmælisterta og einum gesti boðið í kaffi og meðþví. Meðfylgjandi mynd sýnir gestinn eina (Henke), Hilmi sem er nýbúin að blása á afmæliskertið (því Valtýr kann það ekki) og Valtýr að ná sér í bláber af afmælistertunni án þess að nota áhöld.

Við sungum að sjálfsögðu fyrir hann og svo fékk hann afmælisgjafir. Frá foreldrunum Little People flugvél, frá brósa sínum Little People lest (sem brósinn átti þegar hann var lítill) og frá Henke ársgjald í Stokkhólmsborgaríbúðarleigumiðluninni. Henke að tryggja það að drengurinn haldi sig í réttri stórborg þegar fram líða stundir !

Valtýr fékk væna tertusneið og gúffaði í sig sem mest hann mátti. Ekki á hverjum degi sem maður verður 1 árs !

Veit ekki nema á sé reynt

2011-01-29T11:50:00.001+01:00

Valtýr er farin að hafa gaman af þessu með "oní" og "uppúr". Voða gaman að troða kubbunum í gatið og heyra þá detta oní dallinn. Auðvitað tekst það ekkert alltaf. Kannski ekki rétti kubburinn, rétta gatið eða rétti hallinn settur á kubbinn í aðkomunni.

En svo varð ég vitni að þessu (sjá neðri mynd). Hló svo mikið að myndin varð skökk. Hann lét reyna á þetta vel og lengi... hvort að staflturninn kæmist kannski oní gatið. Ég meina... flestallt annað kemst þarna oní ! ;)

Minnstasti leikskólastrákurinn okkar

2011-01-25T20:35:00.002+01:00

Í dag var fyrsti leikskóladagurinn hans Valtýs. Verð að viðurkenna að sú lífsreynsla toppaði næstum því daginn sem við komum með Valtý heim af fæðingardeildinni ;) Finnst alveg óhemju stutt síðan ég sat inná sömu leikskóladeild, með sömu fóstrunni að gera sama hlutinn með Hilmi þegar hann var 2gja ára. Þá var hann að vísu búin að vera á hinum leikskólanum, niðri í bæ, frá 1 árs aldri. Aðlögunin var nú samt keimlík þessari í dag.

Og bara þessi minning. Að berjast við að fá Hilmi til að sofna í hvíldartímanum, sem hann vildi alls alls ekki heldur grét og vesenaðist sem mest hann mátti. En Valtýr sofnaði á innan við þrem mínútum án stærri vandræða svo ég gat læðst í burtu og fengið mér kaffibolla með hinum foreldrunum.
Að skipta svo um bleyju á stóra skiptiborðinu þar sem þeir báðir heillast af stjörnuóróanum í loftinu. Reyndu báðir að opna grindverkið sem lokar af deildina frá restinni af leikskólarýminu, án árangurs. Gleyma sér í öllu nýja dótinu, plokka niður allar myndir sem festar eru upp með kennaratyggjói og gúffa í sig hádegismatinn með bestu lyst. Fara svo heim sælir og ánægðir í lok dags. Leikskólastrákar á Igelbäcken.
Allt með þriggja ára millibili :D Er tíminn svona afstæður ?

Valtýr tönnslutröll

2011-01-20T09:51:00.001+01:00

Já hvaða óargadýr er nú þetta ? Allavega nógu margar tennur til að geta hrætt úr manni (móður)lífið. Fegin allavega að vera ekki lengur með hann á spena ! ;)

Valtýr er að verða vel tenntur enda getur hann núna tuggið í sig kex á millisekúndu, brutt perubita án vandræða og opnað box og dósir með loki hikstalaust.

4 uppi og 4 niðri eru þær orðnar.

Verðandi skólastrákur !

2011-01-20T09:48:00.000+01:00

Hér gefur á að líta Hilmi í væntanlega-verðandi skólanum sínum. Sá heitir Igelbäcksskolan og er hérna í hverfinu okkar. Steinkastsfjarlægð frá Igelbäcksförskolan sem hann er búin að dveljast á undanfarin 3 árin. Það var nefnilega boðið uppá heimsóknarkvöld í gær þar sem foreldrar og börn fengu að koma og kíkja á það sem væri í vændum. Börnin fengu að spreyta sig í allskonar föndri og þrautum, danshreyfingu og svo boðið uppá pulsur og djús.
Hilmi fannst þetta allt mjög spennandi og tók föndurverkefnið afskaplega alvarlega. Þarna sést hann vera að búa til hús úr þríhyrning ofl.

Hann er alsæll yfir tilhugsuninni að vera að fara í skóla. Á þarna eftir að hitta marga góða vini úr leikskólanum sínum sem byrjuðu í skólanum fyrir ári síðan.

Valtýr 11 mánaða

2011-01-07T21:42:00.002+01:00

Valtýr formlega orðin 11 mánaða og tveim dögum betur en svo. Hann gengur hér um gólf daginn út og inn, hverfur oft úr augnsjón smástund og kemur svo tillbaka jafnharðan. Skoðar sig um, athugar hversu langt hann getur farið sjálfur áður en það verður pínu scary. En er semsagt eiginlega alveg hættur að skríða nema í undantekningartilfellum.

Hann vill helst borða sjálfur og allra helst vill hann borða okkar mat. Er voða flínkur að nota gaffal og þverneitar að nota plastsmekk. Alltof babylegt !?

Valtýr bætti tveim glænýjum framtönnum í neðrigóm við tannasafnið svo nú er hann samtals með 8 tönnslur í munni sér. Enda farin að borða epli einsog ekkert sé.

Hann spjallar mikið. Mest óskiljanlegt en það má greina úr eftirfarandi; mamma, pabba, datt, dudda, tetta (þetta) og takk.

Hann sefur ennþá tvisvar á dag en ef nætursvefninn lengist örlítið og við förum seint á fætur nær hann að endast á bara einum dagslúr. Og oftast sefur hann úti í vagninum sínum sem fær að standa í svalahurðaopinu svo rétt hitastig fáist (hér er oft -15 gráður útivið).

Eftir 18 stutta daga byrjar svo Valtýr í leikskóla ! Japp. Skrýtið.. mest fyrir mig og litla mömmuhjartað mitt sem finnst hann svo ogguskonsuponsu lítill. En einhverstaðar verður litlibróðir að vera meðan pabbinn vinnur og mamman fer á fyrirlestra í skólanum. En eflaust blessast þetta nú allt saman. Hilmi fannst allavega voða gaman á leikskólanum þegar hann byrjaði á sama aldri, rauk inn á hverjum degi og maður átti í mesta bastli við að ná honum heim í lok dags ! ;)

Frumraun á sleða

2011-01-01T16:10:00.002+01:00

Nýársdagur var nýttur í að gera einhvað nýtt. Allavega fyrir Valtý sem aldrei hefur fengið að prófa að sitja á sleða og láta draga sig. Honum fannst það að sjálfsögðu algjört æði og nýtti frelsið úr vagnaprísundinni til að skríða um í snjónum, klappa snjónum og smakka á snjónum ;)

Aðfangadagskvöld í Kista

2010-12-24T22:46:00.002+01:00

Við stækkuðum fjölskylduna um mörghundruðprósent frá því síðustu jól þegar við vorum bara þrjú í kotinu (við hjón + Hilmir). Nú er að sjálfsögðu Valtýr búin að bætast við og svo var stórasystirin hún Elísa hjá okkur yfir hátíðarnar.

Taka ekki örugglega allir lesendur eftir útbúnaðinum á drengjunum ? Handprjónaðar þverslaufur og berfættir ?! Forgangsröðunin alveg á hreinu; þægindi en klassi á liðinu ;)

Margir pakkar opnaðir en Hilmir fékk þennan risakassa sem innihélt "stórustrákahjól". Valtý fannst skemmtilegast að fá að príla uppá kassanum.

Þegar maður er ekki orðin nógu stór til að ráða við "opna-pakka" tæknina er gott að eiga stóra systur sem getur sýnt manni handtökin.

Ný barnapía

2010-12-14T13:28:00.002+01:00

(Enn ein) ný barnapía hefur verið fundin. Hef ekki prufukeyrt hana enn á drengjunum en hef alveg déskoti góða tilfinningu fyrir henni. Hlakkar næstum til að kynna hana fyrir þeim bræðrum og leyfa henni að spreyta sig. Hlakka enn meira til að koma heim aftur og sjá allt í tipptopp standi og drengina vatnsgreidda að spila Ólsen við eldhúsborðið.

Hún er fullorðin (38 ára) og barnlaus. 20 ára reynslu af leikskóla en er í námi núna og les barnasálfræði. Býr í 25 mín almenningssamgöngufjarlægð frá okkur. Er vog, á tvö yngri systkini og fædd í Marokkó. Segist ætla að vinna með börnum alveg þartil hún fer í gröfina.
Við sátum á sófanum og kjöftuðum í klukkutíma. Þannig er gott atvinnuviðtal í mínum huga ;)

Þegar við kvöddumst faðmaði hún mig og sagði "ekki hafa neinar áhyggjur Begga".
Ráðin !

Jól nálgast

2010-12-10T11:26:00.002+01:00

Svona gekk jólamyndatakan á þessu heimili. Náðum þó nokkrum ágætum myndum sem lentu á jólakorti ársins en oftast leit það svona út (sjá mynd). Valtýr að krafsa í stóra bróður sinn og berjast um og Hilmir að skellihlægja og reyna að halda honum föstum. Semsagt mikið af hreyfðum myndum...

Klassískt !

Árið fer að verða búið og þar með fæðingarorlof föðursins. Ég komst inn í áframhaldandi nám sem verður frammað sumri svo Valtýs bíður leikskóladvöl nokkra daga í viku. Hann byrjar þar 25. janúar og svo er bara að sjá til hvernig honum líkar viðveran á Kotten, sömu deild og Hilmir var á fyrir 3 árum síðan.

Finnst hann samt engan vegin jafn "fullorðin" og þegar Hilmir byrjaði sína leikskóladvöl á sama aldri. Valtýr er líka meira mömmudýr og gengur ekki mörg skref í burtu frá manni án þess að líta um öxl sér og biðja mann að elta sig.

Björgin okkar

2010-11-17T21:33:00.002+01:00

Þeir bræður voru kátir litlir sláturkeppir hér í síðustu viku með að fá heimsókn frá Íslandi. Ingibjörg góðvinkona okkar gladdi okkur með nærveru sinni í nokkra daga og var mikið borðað, hlegið og kósístundast. Drengirnir fengu ófá knúsin og Hilmir naut meðal annars góðs af hálftíma kvöldlestri marga daga í röð uppúr glænýju herramannabókunum sínum sem honum voru færðar.

Myndin sýnir svo glöggt hversu stór Valtýr er orðin... og tennurnar í bæði efri og neðri góm ;)

Glatt á hjalla !

Fyrstu skrefin !

2010-11-17T15:05:00.002+01:00

Valtýr getur ekki skriðið á eðlilegan hátt. Dregur sig áfram á maganum og virðist ekki fatta að setja undir sig hnén. En að sjálfsögðu vill hann komast áfram og því hefur hann verið alveg ótrúlega duglegur við að koma sér um standandi á afturfótunum einsog við mannfólkið í kringum hann.
Löngu farin að labba meðfram húsgögnum heimilisins og lætur sér nægja að halda í okkur með annari hendinni þegar á að leiða hann um íbúðina. Voða góður með sig og öruggur. Við höfum meira að segja geta haft ofanaf fyrir honum með því að búa til þrautabraut (raða stólum saman) svo hann geti komið sér frá einum enda herbergisins til annars.

Í dag, 17. nóvember kl 14 að staðartíma tók Valtýr sín fyrstu óstuddu skref. Hann var að skoða fjarstýringu á borðinu og vildi komast til mín þar sem ég sat á gólfinu rétt hjá honum. Ég sá að hann reiknaði út hvort hann næði til mín án þess að þurfa annaðhvort að kasta sér yfir til mín eða biðja um hendina (sem hann er annars duglegur að gera, réttir fram litlu búttuðu puttana sína og segir ákveðinni röddu "ah ah!"). Svo bara snéri hann sér á hæli og tók tvö skref til mín. Ætlaði varla að trúa þessu ! Stuttu seinna lét ég hann á gólfið og sleppti og hann endurtók tveggja skrefa gönguna að nærsta húsgangi.

Valtýr er þar með algjörlega búin að sprengja viðmiðunarskalann sem við erum með á þeim bræðrum. Í dag er hann tæplega 9,5 mánaða. Hilmir tók sín fyrstu skref 11 mánaða og gekk öruggur rétt um mánuði seinna.
Svo nú bíðum við spennt !

Haustganga

2010-11-14T14:14:00.002+01:00

Þvílíkur dýrðarmorgun sem við Hilmir fengum að njóta með sænskum hverfisvinum í dag. Höfðum lengi talað um að fá að slást í för með útivistaráhugafólki og þriggja barna foreldrunum sem meðal annars eiga hana Kötu sem Hilmir ætlar að giftast þegar hann verður stór (og að sögn Kötu eignast 4 börn með).
Í dag kom loks sá dagur. Hittumst kl 10 í morgun og spásseruðum saman úti nærliggjandi skóg þar sem þau vissu af eldstæði sem hægt væri að nota. Þar var hoggin niður eldiviður á staðnum (já, þau voru með öxi í töskunni sinni) og kveikt upp í (já, þau kunnu svoleiðis).
Á eldinn var svo lögð heljarinnar panna (sem þau höfðu gert sér lítið fyrir og borið útí skóginn) þar sem steiktar voru pylsur, bakað brauð (já þau komu með deig) og í desert boðið uppá nýbakaðar krabbelurer-pönnsur velltar uppúr sykri (já.. þau stóðu fyrir því líka).

Krakkarnir fengu að rúlla, hlaupa og hoppa í skóginum og fylla svo mallakúta af mat. Þrem klukkustundum síðar vorum við komin aftur í menninguna leirug uppfyrir haus og hæstánægð. Frábær dagur sem við ætlum pottþétt að endurtaka næst þegar verður komin almennilegur snjór. Þá er stefnt á 10 km göngu og grill :)

Bræður ? Ójá

2010-10-29T13:15:00.002+02:00

Samanburður hefur sannreynt bræðerni Valtýs og Hilmis. Held það fari ekkert á milli mála en okkur finnst alltaf jafn gaman að skoða myndir af þeim á sama aldri og sjá svipinn.

Rétt tæplega 9 mánaða þarna báðir á þessum myndum.

Myndavélafikt

2010-10-28T20:35:00.002+02:00

Drógum fram "stóru" myndavélina okkar og bjuggum til ljósmyndastúdíó með bakgrunni, gæru og alles... alveg hreint ágætis afrakstur svona í fyrstu prufunni enda svo fallegar fyrirsætur sem við eigum ;)

Stækkað aðeins ?!

2010-10-10T17:08:00.001+02:00

Sami drengur. 8 mánuðum síðar.

Skriðtök

2010-10-10T17:04:00.005+02:00

Valtýr er núna orðin jafn gamall Hilmi þegar sá síðarnefndi tók sín fyrstu almennilegu skriðtök, 8 mánaða og fimm daga. Það vantar ekki uppá æfinguna en einhvernvegin lætur hann sér nægja að toga sig áfram á höndunum í stað þess að láta hnén gera sitt. Er farin að ná býsna góðum hraða með þessari skriðtækni (sjá mynd) þannig að kannski hann láti sér það nægja.

Annars er hann komin með þriðju tönnina. Sú ku vera uppí efra gómi.

8 mánaða skýrsla

2010-10-06T10:32:00.002+02:00

Valtýr Karl formlega orðin 8 mánaða.
Ekki farin að skríða ennþá en vandar sig þeim mun meira við að standa og ganga. Getur gengið meðfram sjálfur en lætur sko alveg vita þegar hann vill fara í spássitúr um íbúðina með aðstoð (býður fram hendina sína í áttina að manni og *ööh! ööh!*). Hann getur ekki setist upp úr liggjandi stellingu en getur staðið upp sjálfur frá sitjandi. Þó skriðtæknin sé ekki komin alveg á hreint þá getur hann snúið sér í hringi á maganum og dregið sig áfram á höndunum örstuttan spöl ef mikið liggur við og einhvað óvenju spennandi er framundan. Hann getur veifað bless, sýnt hvað hann er stór og klappað. Tek fram að hann g e t u r gert þetta en gerir það ekkert endilega eftir beiðni... bara svona þegar vel liggur á honum ;) Blessveifið kemur til dæmis gjarnan þegar maður er hættur að veifa og hálffarin útúm dyrnar.

Hann er hættur að drekka mömmumjólk og er ágætlega duglegur að borða allan mat. Kannski ekki alveg jafn mikið matar-ryksuga einsog stóri bróðirinn, sem tróð í sig öllu sem látið var fyrir framan hann, en borðar alveg heila skammta af graut og mauki án vandræða. Pela fær hann fyrir lúranna sína og á morgnana til að lúllast aðeins áfram. Í nótt svaf hann fyrstu nóttina sína án þess að vakna neitt til að drekka í morgunsárið... vaknaði reyndar fyrir vikið úthvíldur kl 6 en iss hvað eru tveir hálftímar milli góðra vina ;)

Valtý finnst gaman að;
- brosa og "hlægja" en þá lokar hann augunum, hallar höfðinu aftur og skælbrosir svo sést í báðar tönnslurnar.
- fara útí vagn í labbitúr. Langskemmtilegast er að fara og gefa öndunum en þær koma svo nálægt vagninum að hann nær að virða þær vandlega fyrir sér.
- fá smá sjónvarpstíma og horfa á Baby Einstein þátt. Líkar misvel við þættina og lætur sko af því vita. Vinsælast er víst "numbers nursery" sem inniheldur mikið af handbrúðusenum.
- vera inní herbergi stóra brósa í göngugrindinni og fá að tæta allt neðanúr hillunum, að tæta í uppþvottavélinni er líka spennó
- fá að opna og loka hurðum, skápum, boxum. Hverju sem er með húni eða loki svo hægt er að sveifla fram og tilbaka.

og leiðinlegt að;
- láta skipta á sér, þolir hreinlega ekki að liggja útaf og láta afgreiða á sér bossann
- borða langar máltíðir. Hefur svo mikið að gera að hann má ekkert vera að þessu hangsi þarna í stólnum
- geta ekki komist áfram sjálfur. Að vera fastur sitjandi á rassinum eða liggjandi á maganum er stundum ansi vel pirrandi og þá lætur drengurinn heyra í sér.

Valtýr er annars orðin 9,5 kg og 71 cm.

Sunnudagar í hverfinu

2010-10-05T20:52:00.002+02:00

Hilmir á standandi deit á sunnudagsmorgnum með ástinni sinni einu henni Kötu. Hún er árinu eldri og byrjuð í skóla svo þau hafa ekki geta leikið saman einsog venjulega á leikskólanum. Þá er nú gott að mömmurnar geti samhæft aðgerðir og útiveru svo þau fari ekki of mikið á mis við hvort annað.

Núna þegar það er farið að hausta getur litlu kroppunum orðið dáldið kalt eftir hamaganginn þannig að síðasta sunnudag tók Kötumamman sig til og bauð uppá heitt kakó.

Á myndunum má sjá Hilmi í góðum félagsskap stelpnanna á leikvellinum. Við erum alveg glimrandi ánægð með að hann sé (vonandi) svona strákur sem fellur vel inn í hvaða kynjahóp sem er ;)

Tvö trikk í einni töku

2010-10-05T20:41:00.002+02:00

Alltaf jafn gaman að því þegar börnin læra svona sirkúskúnstir. Og alltaf verður maður jafn rífandi stolltur af litla molanum ;)

In the army now ?

2010-09-26T20:19:00.001+02:00

Hann "farbror Henke" er á leið að gæta friðs og sveita í Kosovo á vegum sænska hersins. Því til heiðurs var boðið til heimsóknardags hjá Livgardet í Kungsängen og að sjálfsögðu rúlluðum við þangað bíl, börnum og buru.

Herinn tók vel á móti okkur. Var boðið til fræðslufyrirlesturs (sjá mynd af Valtý kampakátur að hlusta á æsispennandi Kosovoupplýsingar), fengum smá sýningu á störfum hervaktar við vegatálma, hádegismat og að lokum fengu krakkarnir að klappa og klifra á bryndrekum. Óheyrilega gaman allt saman. Sérstaklega fyrir Hilminn sem nú hefur fengið sönnun fyrir því að Henke sé "alvöru" hermaður.

Hilmir og Henke. Hilmi var boðið að máta allan búninginn en lét sér nægja höfuðfatið ;)

Byrjaður að bræða

2010-09-24T21:22:00.000+02:00

Valtýr er búin að ná tökum á smajlinu. Þessu sem á eftir að bræða jafnt mæður sem dætur þeirra. Á eftir að fá mann að gefa honum ís á miðjum mánudegi, fyrirgefa sér fyrir að vekja mann kl 5 á morgnana og lána sér bílinn til að fara á rúntinn.

Hann er annars að skríða í 8 mánaða markið. Og ekki enn farin að skríða. Of upptekin við að standa. Standa. Og standa.
Við spáum því jafnvel að hann láti skriðið bara framhjá sér fara. Spennó.

Tennur koma og fara...

2010-09-17T16:40:00.002+02:00

Eins og vitað er fékk Valtýr sínar fyrstu 2 tennur hér fyrir allmörgum vikum síðan. Hinar hafa ekkert skotið upp kollinum en við bíðum spennt eftir framhaldi á tanngarðamyndun drengsins.

Hinsvegar er hægt að bera fréttir af tann-leysi Hilmis. Eða það er að segja... verðandi tannleysi hans því enn situr tönnin fast. En honum til mikillrar gleði og ánægju situr ein af framtönnum neðri góms laus. Svo laus að hann getur "vickad" (hreyft fram og aftur) hana. Þetta finnst honum mjög merkilegt því núverandi bästisinn (besti vinurinn) hans á leikskólanum hann W er búin að missa næstum allar framtennur í bæði efri og neðri góm sem þykir mjöööög eftirsóknar og aðdáunarvert.
Við höfum að sjálfsögðu frætt hann um tilveru tannálfsins sem ætlar að borga honum fyrir tönnina þegar þar að kemur. Og fyrir peninginn er Hilmir fastákveðin að kaupa sér hund. Sko... vélmennahund sem getur komið í stað alvöru hunds þartil við getum fest kaup á slíku eintaki (eee... tímasetning algjörlega óákveðin).

Góðar stundir

2010-09-12T21:19:00.002+02:00

Valtý finnst örugglega sérdeilis ágætt að eiga stóran bróður sem getur lesið fyrir sig :)

Það er einmitt á svona stundum sem við foreldrarnir dæsum og rifjum upp að það var akkúrat útaf þessu sem við létum það rætast að eiga þá tvo. Tvo en ekki bara einn. Tvo sem geta haft aðeins ofanaf hvor öðrum. Dundað sér. Til dæmis við lestur uppbyggilegra bóka einsog "orðabók Molly mús"....

Kvöldrútínan

2010-09-02T21:01:00.002+02:00

Það er alltaf sama rútínan á þessu heimili á kvöldin. Klukkan sex fær Valtýr grautinn sinn... borðar hann með semingi og kvartar svo hástöfum þartil hann er tekin úr plast-stólnum sínum og settur í venjulegan stól við matarborðið (sjá mynd). Hann getur unað sér þar alveg heillengi og þá náum við hin að klára máltíðina.

Eftir mat er svo baðtími og þá er ágætt að nýta bæði tíma og vatn og baða þá bræður saman. Mikið busl, mikið sull en gjörsamlega þess virði...

Valtýr á viktinni

2010-08-25T22:37:00.002+02:00

Fór með Valtýr í 6 mánaða læknisskoðunina í dag. Hann er nátturulega löngu orðin 6 mánaða... og fer að styttast í 7 mánaða daginn... en vegna sumarfría þá varð svo úr.

Drengurinn er orðin rétt rúmlega 9 kg og um 70 cm. Fylgir sinni kúrvu alveg einsog línuritið segir til um. Og að sjálfsögðu stóðst hann öll þroskapróf; færa dót milli handa sér, brosa og hlægja, ásamt staðfestingu á að hann gæti bæðið setið og snúið sér liggjandi sjálfur.

Og tala ! Jájá, hann talar alveg helling. Eða.. "talar" (með gæsalöppum). Þessa dagana er það mikið "mamamamamama". Eitt heljarinnar mömmuákall. Eða bara hann að æfa sig á hljóðum. En að sjálfsögðu hlýnar mömmuhjartað sérstaklega við þessi áköll. Velgist svo örlítið aftur þegar ENGIN nema ég má svæfa hann eða halda á honum. Teygir út litlu handleggina sína og krefst þess að koma til mín. Ekkasog í hálsakot þegar hann kemst á áfangastað og vill helst sofna með svokallaðri handayfirlagningu þar sem hann vill láta höndina mína liggja yfir öllu andlitinu sínu. Fallegt og eðlilegt en pínulítið þreytandi til lengdar. Sérstaklega þegar það er Ingó sem er komin á fæðingarorlofs-vaktina og er nú umsjónaraðili númer eitt ;)

5 ára... FIMM !

2010-08-20T20:32:00.002+02:00

Stórum áfanga náð í dag. Hilmir loksins loksins LOKSINS orðin 5 ára gamall. Komin uppí heila hendi með alla fíngur útglennta þegar telja á árin. Og finnst hann vera voða fullorðin þessa dagana. Ábúðarfullur og íhugull. Og ekkert smábarn lengur. Sem sannast best í því að eftir mikla umhugsun um hvað ætti að vera í "afmæliskvöldmatinn" þá ljómaði hann einsog sól í heiði þegar hann komst að því að það gæti verið sushi í boði. Jááá ! Suuussshiii !!

Eins og sést á myndinni gefst hann ekkert upp við prjónanotkunina. Sem er nógu flókin fyrir flesta fullorðna. En hann ræður býsna vel við þetta og náði að borða heila máltíð með réttu tólunum.

Pakkar sem opnaðir voru í dag innihéldu meðal annars risastórt Legó-StarWars geimskip, Ben 10 þyrlu og Ben 10 fígúruna sjálfa ásamt bók um Kugg í útileigu sem lesin var (með miklum tilþrifum) fyrir háttatímann.

Á morgun verður svo heljarinnar afmælisveisla með Spiderman þema og hellings helling af kökum. Eins og venjulega var Hilmir með ákveðnar óskir um afmælisköku sem að sjálfsögðu var tekið fullt tillit til. Myndir verða birtar innan skamms ;)

Rólupróf

2010-08-18T10:56:00.002+02:00

Það var sko megaróludagur tekin um helgina þegar við fórum í gamla góða Tessingparken á Östermalm/Gärdet þar sem við bjuggum áður en við urðum Kista-fjölskyldan.
Valtýr fékk að frumreyna að sitja sjálfur í rólu og líkaði það alveg stórvel. Held það hafi nú samt verið meira gaman að vera í stórurólunni hjá pabba ;) Meira hægt að príla þar nefnilega...

Skansendagur

2010-08-17T21:40:00.002+02:00

Við ákváðum að byrja "heimavikuna" okkar með stæl og skelltum okkur á sólríkum mánudagsmorgni útá Skansen. Þar beið okkar hádegisverðarhlaðborð, apar, birnir og ugglur. Ekki slæmt það !

Verð að taka fram að á hádegisverðarhlaðborðinu voru nú engin dýr annað en þau venjulegu sem finna má í áleggi og kjötbollum... býsna gott og ekki var nú veitingastaðurinn af verri gerðinni. Þar sem við sátum og nutum matarins í fallegu umhverfi með alveg æðislegt útsýni áttuðum við okkur á því að þetta væri fyrsta alvöru veitingahúsaferð Valtýs. Hann hagaði sér alveg óhemju vel einsog vera ber þegar maður er vel upp alin 6 mánaða gaur. Japlaði á brauðsneið, lék sér að dóti, nöldraði örlítið þartil hann fékk nýja bleyju og pelasjúss.. og sofnaði svo súpersáttur í vagninum sínum meðan við hin gæddum okkur á eftirréttum.

Svo rölltum við um og skoðuðum dýrin sem flestöll voru frekar löt við að láta sjá sig. Selirnir voru í feluleik, birnirnir sváfu á sínu græna, ugglan snéri baki í mannfólkið... og svo framvegis. En samt höfðum við nú ánægju af enda margt annað að sjá á leiðinni. Hápúnkturinn var nú samt apahúsið. Þar getur maður gengið í gegnum lemúrabúrið og fengið að sjá þá MJÖG nálægt enda eru þetta forvitnir apar með meiru. Ég gekk þarna á eftir Hilmi og endurtók þúsund sinnum það sem staðið hafði á skiltinu á leiðinni inn; "ekki snerta!, ekki snerta!". Frekar erfitt því það er svooo freistandi að rétta fram höndina og taka þessa krúttlegu litlu lemúra í fangið. En við höfðum hemil á okkur.. bæði tvö ;)

Síðustu og fyrstu dagar

2010-08-10T12:52:00.002+02:00

Er að nálgast tímamót í lífi okkar ; þar sem Valtýr er orðin 6 mánaða gamall verða þáttaskil í ummönnun hans í næstu viku. Ingó fer í fæðingarorlof og ég að byrja að undirbúa lokahnykkinn í náminu. Alveg hreint ótrúlegt að hugsa til þess að ég sé búin að vera heima með hann í hálft ár og vel það. Tíminn hefur liðið einsog hendi hafi verið mis-kæruleysislega veifað.
Fyrsta vikan á þessu nýja tímabili verður dulítið sérstök því við höfum ákveðið að bæta aðeins við sumarfríið okkar og hafa "heimafrí" ! Hilmir tekur sér viku leikskólafrí og við ætlum að nýta tímann til að gera saman hluti sem ekki hafa náðst á heimavelli þetta árið; fara á Skansen, Gröna Lund og ef til vill í smá útsýnisbátsferð líka. Varla hægt að búa hér í á áttunda árið án þess að fara í alvöru útsýnisbáta- eða strætó ferð um borgina ?!

Annars er það í þroskafréttum af Valtý að hann er nú komin skrefi nær skriðtækninni. Getur núna rúllað sér í allar áttir og brölltir sér áfram með tánum (skýtur undir sig hnjánum svo rassinn stendur beint uppí loft) ef það er einhvað framundan sem honum langar virkilega í. Vantar bara uppá styrkinn í handleggjunum og þá er hann lagður af stað!
Hann nýtur þess í botn núna að vera í göngugrindinni sinni og uppáhalds leikstaðurinn í henni er inni hjá Hilmi. Þar nær hann í næstneðstu dótahilluna þar sem lögð hafa verið smábarnaheld leikföng sem hann fær að skoða/naga/sjúga/berja í einhvað. Hilmi finnst voða spennandi að hafa hann inni hjá sér og finnst nú loksins farið að nálgast aðeins að þeir geti "leikið saman". Sjáum til hvernig hljóðið verður í kallinum eftir nokkra mánuði í viðbót þegar tætingurinn fer í hámark ! ;)
Við kíkjum uppí góm á drengnum annanhvorn dag til að fá útskýringar á röflinu í honum. Hann nefnilega grætur sjaldan þessi litli úngi en nöldrar þeim mun meira. Oft með háværum röfltónum svo minnir á alþingisumræður. En þetta gætu svosum alveg eins verið raddæfingar hjá herranum. Háværar eru þær allavega. Helga amman spáir því að hann verði söngvari. Við spáum áframhaldandi röfli....

Hilmir löggumann

2010-08-09T20:21:00.001+02:00

Hilmir á augljóslega bjarta framtíð fyrir sér hjá lögregluembætti Stokkhólmsborgar. Allavega smellpassar löggubolurinn og svo tekur hann sig hrikalega vel út í honum ;)

Bjútíboj

2010-07-30T20:20:00.002+02:00

Þetta eintak er það sætasta suður fyrir sólarupprás... sex dagar í sex mánaða afmælisdaginn hans og hann heillar okkur ennþá uppúr skónum með smitandi hlátri sínum, óvæntum brosum og ómótstæðilegri ungbarnalyktinni í hálsakotinu (sem vegar upp á móti óheyrilega ílla lyktandi kúkableyjum).

Krúttkroppur og bjútíboj með meiru ;)

Fjör á matartíma

2010-07-30T20:07:00.002+02:00

Matartímarnir hér á heimilinu eru orðnir ansi fjörugir. Báðir drengirnir borðandi, hver með sinni tækni og hljóðum fylgjandi því. Valtýr með aðstoð annars hvors okkar foreldranna en Hilmir er náttlega löngu útskrifaður af þeirri deildinni þó það þurfi stundum að minna hann á að halda einbeitingunni og "hafa munninn yfir diskinum" svo ekki stækki matarfjallið undir stólnum hans.

Þeim finnst jafn spennandi að fylgjast með hvor öðrum borða. Hilmir fær meira að segja stundum að mata þann litla... algjör hápúnktur ;)

Strákar

2010-07-23T13:43:00.003+02:00

Rakst á lítið ljóð í dag sem ég bara verð að stela, þýða og birta hér því mér finnst það eiga stórkostlega vel við minn eldri (biðst afsökunar ef þetta er hundléleg þýðing á einhverju þegar margbirtu);

Strákar eru til í mörgum stærðum og gerðum,
Þeir eru allstaðar; ofaná, undir, klifrandi á, hangandi í, hlaupandi um og hoppandi yfir.

Mæður elska þá, litlar stúlkur þola þá varla,
eldri systur og bræður þola þá rétt svo,
stóra fólkið lætur sem það sjái þá ekki, en sá á himnum verndar þá.

Strákur er sannleikurinn með svartan blett á nefinu,
gáfur með tyggjó í hárinu
og framtíðarvon með frosk í vasanum.

Strákur er töfrum búin vera - maður getur læst hann úti
úr handavinnuherberginu en ekki úr hjarta sér.

Og þegar maður kemur heim á kvöldin
örþreytt með einungis brotin af framtíðardraumunum afgangs
þá lagar hann það með þessum tveim töfraorðum;

Hæ mamma !!

Tvítenntur

2010-07-21T13:17:00.002+02:00

Tannraunum Valtýs var aldeilis ekki lokið eftir að fyrsta framtönnin stakk sér upp í gómnum. Sú við hliðina á lét sjá sig örfáum dögum síðar.
Hann er því tvítenntur drengurinn !

Sjást þær ekki örugglega á myndinni ;) Þarna í neðri góm...

P.s. þessi ótrúlega flotti smekkur sem hann er með er framleiddur af móðursystur hans henni Söru. Hef fengið mörg "vá, en sniðugt og flott!" frá Svíiunum útá hann ;) Íslensk handavinna slær í gegn !

Verðandi vinir

2010-07-20T11:26:00.002+02:00

Þessir tveir eru verðandi vinir. Bara um leið og þeir uppgötva hvorn annan á dýpri og innilegri hátt en bara sem "manneskjan við hliðina á mér". Vináttan er næstum algjörlega garanteruð þar sem þeir eru bæði grannar hér í Kista og verðandi leikskólafélagar... og það meira að segja á sömu deild ! Bara sex vikur sem skilja þá að í aldri.
Æsispennandi framhald fylgir á komandi mánuðum ;)

Tannálfur

2010-07-16T10:50:00.002+02:00

Ókei... við höfum heyrt þetta með "engin börn eru eins" og vissulega eru þeir ólíkir í skapgerð bræðurnir Hilmir og Valtýr. En líkamlega furðu líkir ! Sannaðist í morgun þegar ég var að leyfa Valtý að naga handakjúkurnar á mér... og einhvað fannst mér neðri gómurinn öðruvísi áferðar en venjulega. Sótti skeið og það klíngdi í hægri framtönninni hjá honum sem er á leiðinni upp.
Ekki nema furða að greyið sé búin að vera skapvondur uppá síðkastið. Ekki nóg með að eyrnabólga skuli hrella hann heldur líka tennur á leið.

Og nú að bræðratvífaraskemmtiatriðinu:
Hilmir fékk sína fyrstu tönn 5 mánaða og 10 daga gamall
Valtýr fékk sína fyrstu tönn 5 mánaða og 11 daga gamall

Furðulegt ?

Heitur dagur í Kista

2010-07-14T12:33:00.002+02:00

Varð að "föreviga" þessa stund með Valtý berrassaðan á gólfinu með goluna frá opinni svalahurðinni til að kæla sig niður. Svona til að ylja mér við á köldum vetrarmánuðum ;)

Sjalasagan heldur áfram

2010-07-14T11:38:00.002+02:00

Nú þegar sumarið er komið var TriCotti sjalið okkar orðið frekar heitt... og aumingja Valtýr farin að soðna í því eftir 2gja mínútna dvöl. Svo þá dreg ég fram bómullar hringasjalið góða sem ég keypti einhverntíman á slikk til að athuga hvort Hilmir myndi sætta sig við það (sem hann gerði ekki!).
En Valtýr er af öðrum ættbálki sjalabarna. Líkar það ágætlega að sitja þarna á mjöðminni á mér og sjá heiminn frá hærri stað.
Getum allavega skroppið útí þvottahús svona ;)

Sitja sjálfur

2010-07-14T11:30:00.002+02:00

Stöðugar sitæfingar undanfarna daga hafa skilað árangri; Valtýr telst nú "sjálfsitjandi með stuðning". Á það til að detta skyndilega afturá bak ef hann er með einhvað í höndunum sem þarf að éta með mikillri áfergju eða hrynja til annarahvorra hliðarinnar en þá nær hann að bjarga sér með því að draga undan sér höndinni og koma sér í magastellingu.

Og alltaf stendur blessaður brjóstagjafapúðinn fyrir sínu ! Sjá hér.

Ekki er ráð nema í tíma sé tekið

2010-07-13T21:55:00.003+02:00

Gerðum ótrúlega furðulegan hlut í gær... sóttum um leikskólapláss fyrir litla sykurstubbinn hann Valtý ! Drengurinn er nú komin með beiðni á sama leikskóla og stóri bróðir frá og með mars 2011. Og hann sem kann varla að sitja (en æfir sig á hverjum degi) !
Fórum nefnilega á óvart inná vefsíðu Stokkhólmsborgar og sáum þar hvernig staðan er í leikskólabiðraðamálum á komandi árum. Þegar farin að myndast röð á Igelbäcken svo við þorðum ekki öðru en koma barninu að.
Svo er bara spurning hvort maður nýti plássið ef það býðst ! ;)

Þaulvanir foreldrar

2010-07-11T21:06:00.003+02:00

Eftir 5 mánaða sprautuna fékk Valtýr hita (sjá fyrra innlegg) sem varði ekki bara kvöldstund eða yfir nótt heldur marga marga marga daga. 3 daga reyndar en okkur fannst þetta nú ekki alveg eðlilegt... svona miðað við aldur og fyrri störf.. okkar foreldranna það er að segja. Einhvað fannst okkur skuggalegt að drengurinn skyldi rjúka uppí nærri 40 stiga hita dag eftir dag.

Svo við tókum þá ákvörðun að fara á upprunastað Valtýs í heimi hér; Danderyd spítalann. Þar er neyðarmóttaka barnalækna sem okkur fannst fýsilegri kostur en að fara á Astrid Lindgren-barnadeildina á Karólínska sem vísaði okkur einusinni heim með fársjúkann Hilmirinn. Hnuss. Látum ekki svindla á okkur tvisvar, ónei !
Svo já þarna á Danderyds vorum við afgreidd af góðlátum ellismella barnalækni sem potaði pínu í Valtý og leit svo í eyrun þar sem staðfestur var grunur móðurinnar þaulreyndu; drengurinn með svæsna eyrnabólgu í vinstri eyra.

Eyrnabólgu. Fimm mánaða. Að sumri til. Okkur grunar Íslandsferðina.... Hmmmm....

Beachboy

2010-07-11T20:58:00.002+02:00

Í dag var steikjandi hiti og ungherra heimilisins vaknaði súpersnemma (6:15) svo við ákváðum að nýta daginn með því að fara á ströndina. Vorum mætt svo snemma að við gátum valið úr skuggsælum grasblettum og förin eftir traktorsrakstur kvöldsins voru ennþá í sandinum.

Allir nutu dagsins og þá ekki síður Valtýr sem svaf í hlýrri golunni, viðraði bossann og lék sér á teppinu okkar.
Þegar við komum heim 4 klst, sveitt og heitt eftir daginn, fengum við staðfestingu á hitanum; 55 gráður í sólinni (mælirinn hangir útum eldhúsgluggann okkar) !

Valtýr 5 mánaða

2010-07-07T22:27:00.002+02:00

Þessi stúfur (sjá mynd) varð 5 mánaða gamall í vikunni. Fór af því tilefni og fyllti á birgðir líkamans af bólusetningslyfjum, eitt í hvort lærið, og fékk alveg herfilega mikinn hita og slappleika eftir það. Greyið litla varð eins og ungabarn á ný, hélt vart höfði og kveinkaði sér yfir öllu. Vildi bara liggja í foreldrafangi. Fékk Alvedon til skiptis í báða enda líkamans. Núna sólarhring síðar er þetta vonandi bara yfirstaðið.

En nú að rapporteringu.
Það sem Valtý, 5 mánaða, finnst skemmtilegt að gera:
- láta brosa til sín
- láta horfa á sig.. því þá gleðst hann voðalega og fer samstundis í gott skap
- láta hlægja með sér, hlær með og skríkir jafnvel (sjá mynd)
- fá að laumuprófa göngugrindina sem hann fær eiginlega ekki að vera í því hann er rétt svo orðin nógu sterkur í bakinu til að geta setið sjálfur í matarstól
- nudda gómnum uppvið hökuna á mömmu sinni, einlæg atlot sem enda oft í hláturskasti móðurinnar (lítur út einsog hann ætli að gleypa mann heila einsog anakonda... og byrji bara á hökunni)
- fá að borða ávaxtamauk hverskonar
- sitja hálfuppréttur í vagninum og skoða heiminn
- busla í baðkarinu (takmarkið er að tæma baðkarið með busli eingöngu)
- tala við Hilmi, horfa á Hilmi, "leika" við Hilmi (láta hann rétta sér einhvað)

Það sem Valtý finnst leiðinlegt að gera:
- láta leggja sig í daglúra þegar hann þykist ekki vera þreyttur
- liggja sekúndu of lengi á skiptiborðinu því þá fer hann að vilja snúa sér og það er ekki hægt þarna uppá
- láta klæða sig í eða úr fötum
- bíða eftir snuddunni þegar hann vill fá hana (og foreldrarnir finna hana ekki því hún er komin undir hann þarsem hann liggur og sefur)
- sitja í bílsætinu og bílinn stendur kjurr

Frumvinir

2010-07-06T13:28:00.002+02:00

Þarna eru þau frumbernskuvinirnir Hilmir og Emilía. Vinskapur sem fer yfir lönd og haf, tíma og kyn. Reyndar fer það ekkert á milli mála að annað þeirra er varfærið og hæglátt meðan hitt er uppátækjasamt og fljótfært (seinni lýsingin á við Hilmi ef það fór á milli mála).
En einhvernvegin geta þau nú samt haft gaman af samverunni hvort við annað ... svona endrum og eins ;)

Sambað

2010-07-06T13:03:00.002+02:00

Hilmir var búin að bíða lengi eftir þessu... að fá að fara í kvöldbaðið MEÐ litla bróður. Sem betur fer hafa allar litlu molluskurnar hans (frauðvörtur) horfið einsog dögg fyrir sólu svo það var ekkert í veginum fyrir þessari bræðrasælu. Og sæla var það. Valtýr skríkti af fögnuði yfir að fá að busla þarna í þessari mínísundlaug (og ekki í bala einsog hingað til) og ekki skemmdi nú fyrir að Hilmir væri oní með honum til að kjá framan í hann.

Held að þetta sé bara málið from now on. Sláum fjöldamargar flugur í einu höggi og báðir hreinir og fínir að verki loknu.

Þessir útlendingar ...

2010-07-05T22:24:00.002+02:00

Íslensk ungabörn skilja ekkert í þessari túnguflækju sem erlendir fréttamenn lenda í (tja eða útlendingar yfirhöfuð!) þegar bera á fram Eyjafjallajökul.
Thelma getur meira að segja bent á jökulinn á landakorti !
Og geri aðrir betur ;)

Sumarbræður

2010-07-05T22:16:00.002+02:00

Svona var sumarið (júnímánuður) þegar best lét á Íslandi; flíspeysa, silkihúfa og ullarbolur á drengjunum. En alveg meiriháttar fallegt veður ! Og við vorum á meiriháttar fallegum stað þarna í grasagarðinum í Laugardalnum daginn fyrir brottför.

Nú erum við komin í alvöru sumarstemmningu hérna í Stokkhólminum. Vandræðin felast enn og aftur hvernig klæða á börnin og þá sérstaklega þann yngri. Sá eldri er góður í stutt-öllu og sterkri sólarvörn. Sá yngri má enga sólarvörn fá svo það er dvalist í skugga og hann fær að íklæðast hvítu frá toppi til táar til að koma í veg fyrir steikingu.

Skelli inn fleiri myndum frá Íslandsferðinni fljótlega....

Síðastliðnar vikur á Íslandi

2010-06-21T14:23:00.003+02:00

Neyðist til að blogga myndalaust til að þurfa ekki að stikla á óþarflega stóru þegar við loksins komumst í að hlaða inn myndir frá síðustu vikum hérna á Íslandi !

Ingó og Hilmir komu til Íslands 10. júní og þá loksins urðum við sem heil fjölskylda og gátum þá flutt mig og Valtý búferlum úr Þverásnum hjá afanum og ömmunni, yfir í Kópavoginn í lánsíbúðina okkar þar sem við gátum öll verið saman á ný. Hann súperdúpervinur okkar og láns-frændi hann Henke kom með þeim feðgum frá Svíþjóð til að vera viðstaddur skírnina og kíkja á landið okkar í leiðinni. Ingó og Hilmir fengu þess vegna að kíkja í Bláa Lónið, Gullfoss, Geysi og Þingvöll með túristann okkar ;)

Skírnin gekk súpervel. Ég var búin að vera að undirbúa með bakstri og ráðagerð í marga daga á undan og gat þess vegna, með yndislegri aðstoð frá foreldrum mínum, systur og tengdó, slegið upp flottasta veisluborði á norðurhjara veraldar. Allavega að mínu mati !
Og þrátt fyrir að það væri búið að vera GRENJANDI rigning tvo daga á undan þá var þurrt á sjálfan skírnardag og sólin fór að verma þegar nær dró hádegi. Tókum þessvegna þá ákvörðun að hafa athöfnina útá palli í Þverásnum og sáum sko ekki eftir því. Akkúrat þegar ég steig út með Valtý skírnarbarn íklæddan silkiskírnarkjólnum góða þá braust fram sólin og fegraði stundina enn frekar. Athöfnin gekk dæmalaust vel, barnið lét í sér heyra þegar hann var stenkaður vatni á höfðið... einsog vera ber (!)... og gestirnir sungu saman "Lítill drengur". Algjört æði. Við vorum í skýjunum í dagslok. Ánægðir gestir, ánægðir foreldrar og sáttur drengur komin í kirkjubækur á Íslandi.

Næst á dagskrá var fyrir Ingó að fara ásamt mömmu sinni til Siglufjarðar að ganga frá smá fjölskyldumálum. Það var laust pláss í bílnum svo við ákváðum á síðustu stundu að bjóða Hilmi að fara með í þessa ferð. Hann reyndist vera því vaxin að sitja í bíl í 7 klst samfleytt (með tíðum pásum) og sofa á vindsængum í ættaróðali langafa síns og langömmu. Enda að verða 5 ára drengurinn :D Þau komu öll tilbaka í gær, sunnudag, reynslunni ríkari.

Núna framundan eru síðustu 2 vikurnar á þessu sumarfríi okkar. Þónokkrar heimsóknir, kvöldverðar, hádegis og kaffiboð komin á planið og okkur hlakkar ferlega til að ná að hitta alla vini og ættingja áður en heim er haldið. Mætti nú samt alveg koma smá alvöru SUMAR veður því við erum meira eða minna búin að hafa uppi flíspeysurnar síðan við komum !

Skipt í tvennt

2010-06-06T22:17:00.002+02:00

Fjölskyldan er í tvennu lagi þessa dagana. Hilmir og Ingó eru heima í Stokkhólmi en við Valtýr í Reykjavíkinni. Komum hingað síðasta sunnudag og höfum nýtt dagana í "lenda" í rólegheitunum, þ.e. hitta stórfjölskylduna, koma reglu á grautargjöfum, minnka tímamuninn osfrv.

Athyglisvert að fá að upplifa íslenskt sumar. Hlýtt og kalt til skiptis með öskufalli í kjölfarið... allt grátt og alls ekki hægt að láta Valtý sofa úti þegar fer yfir ákveðin loftmengunarmörk.
Hann hefur annars tekið vel í grautargjafirnar. Ekkert mallavesen lengur, gæti verið að fara betur í hann að fá hirsigraut. Sama saga og með Hilmi á sínum tíma.

En alltaf er nú best að vera í tveggjamannaliðinu með börnin okkar tvö þannig að okkur Ingó hlakkar báðum til fimmtudags því þá verðum við öll saman á ný.
Því miður get ég ekki hlaðið myndum útaf myndavélinni til að sýna Valtý með öllu nýja fólkinu sem hann hefur verið að hitta hérna en það stendur til að bæta úr því....

Grautarsullið byrjað

2010-05-25T09:12:00.002+02:00

Valtýr fékk sína fyrstu grautarskeið á sunnudaginn 15 vikna og 2gja daga gamall. Höfðum fengið þessi vinsamlegu tilmæli frá ungbarnaeftirlitinu eftir að ég útskýrði fyrir frúnni þar á bæ að þrátt fyrir ítrekaðar brjóstagjafir (tvöfalt meira en venjulega) undanfarnar 3 vikurnar þá ætti Valtýr erfitt með að sofa á daginn og þar af leiðandi frekar önugur og ósáttur. Pelagjöf með þurrmjólk breytti engu og því dró ungbarnafrúin þá ályktun að miðað við líkamsstærð og hegðunarmynstur þá væri drengurinn tilbúin að fá fastari fæðu en mjólkina eingöngu.

Hann tók ósköp vel á móti fyrstu skeiðinni. Smjattaði á þessu og fannst bara ágætt að því er virtist. Allavega engir ógeðissvipir eins og þegar ég kynnti hann fyrir þurrmjólkinni í fyrsta sinn.
Við ætlum að auka við skammtinn hægt og rólega á komandi dögum. Skrýtið að það sé strax komið að þessu grautarsulli...

Vel snúinn í allar áttir

2010-05-21T09:36:00.003+02:00

Valtýr er núna snúinn. Í báðar áttir. Alveg sjálfur. Kemur semsagt frá maga yfir á bak OG frá baki yfir á maga.
Sem þýðir að nú þurfum við að hafa vakandi auga með honum á skiptiborðinu og skila snarlega vöggunni. Varla að hann geti setið í ömmustólnum án þess að hann reyni að snúa sér...

Til fróðleiks má nefna að hann sló bróður sínum við um nokkrar vikur. Hilmir var reyndar ofurfljótur að ná öfugsnúningnum en var komin aðeins yfir 4 mánaða aldurinn áður en hann náði bak-maga snúningnum.
En að sjálfsögðu á maður ekki að miða við "önnur börn"... nema innan fjölskyldunnar séu ? ;)

Mitt sjónarhorn

2010-05-13T20:01:00.000+02:00

Tvisvar á dag, á morgnana og aftur um eftirmiðdagin, hef ég þetta framfyrir augu mér. Valtýr steinsofandi í vagninum sínum og Hilmir á sparkhjólinu sínu. Ágætis hreyfing og útivera fólgin í þessum ferðum til og frá leikskólanum sem gefur mér samtals 5.000 skref daglega á skrefamælinum mínum og sólbrúnar hendur (athugið... ekki handleggi heldur bara handabak og fingur... frekar skrýtið að sjá það).

Where is... Valtýr

2010-05-13T19:14:00.000+02:00

Hvað tók það þig langan tíma að finna Valtý ? Jújú hann er þarna í fanginu á mér á miðjum "pallinum" í gróðurreitnum okkar. Pallurinn samstendur af gömlum brettum og frekar mikið veðruðum garðhúsgögnum (og stofuhúsgögnum). Ekki búið að snerta þetta í 3 ár og það sést.
Við erum semsagt komin með nýjan gróðurreit, stærri og nær leikskóla og heimilum. En búið að vera mikið verk að stínga upp og koma í horf svo hægt sé að setja niður einhvað af viti. "Pallurinn" hefur þess vegna fengið að bíða.... einsog sést. En kostir brjóstagjafar eru óheyrilega margir. Meðal annars hægt að gefa hvar og hvenær sem er. Jafnvel þó maður sitji í miðjum ruslahaug ;)

Lestrarstund

2010-05-11T20:53:00.000+02:00

Hilmir er alltaf til í að sinna litla brósa sínum smástund. Sveifla dóti fyrir framan hann, hjálpa honum að grípa í einhvað og stínga því uppí sig... nú já og lesa kusubókina góðu ;)
Hann ætti nú annars að vera orðin vel fær í söguþræði kusubókarinnar hann Hilmir því hann "las" þessa bók mjúku spjaldanna á milli þegar hann lítill. Og nú er næsta kynslóð tekin við, með smá hjálp....

Snúsnú !

2010-05-10T20:06:00.003+02:00

Nú þegar Valtýr er orðin þriggja mánaða er hann í stífu æfingarprógrammi hjá sjálfum sér. Einn daginn æfir hann vinstri hendina, næsta dag þá hægri og svo samhæfingu beggja á þriðja degi. Í gær tókum við eftir einhverskonar skrúfangi á drengnum þar sem hann lá á teppinu sínu og í dag blasti þessi sjón við mér þegar ég leit á hann í vöggunni. Búin að koma sér í þessa stellingu alveg á eigin vegum.

< Það þarf örlítið að hjálpa honum að ná snúningnum alla leið yfir á maga en þegar þangað er komið er hann voða duglegur að halda höfði, skoða sig um og æfa fyrir það sem koma skal. Eflaust ekki langt í það að hann geti þetta sjálfur ! :)

Vorstráksinn

2010-05-03T12:56:00.000+02:00

Hilmir var tekin í heimaklippingu um helgina. Aðeins ráðist á toppinn sem var farin að læðast langt niður að augum. Förum svo í alvöru klippingu hjá einhverri góðri á Íslandi sem veit hvernig á að klippa drengi sem vilja hafa sítt hár. Klippikúrdinn á horninu var engan vegin að fatta það nefnilega og klippti hann ítrekað svo úrkoman varð sveppahaus einhverskonar.

En nú eru góðar andlitsmyndir af þeim bræðrum hérna á blogginu svo hægt sé að bera þá ungherrana saman. Eigum við að ræða þessi kinnbein á þeim ? Held þau hafi hoppað einsog einn ættlið....

Valtýr fór í þriggja mánaða sprauturnar sínar í dag. Grét varla meira en nokkrar sekúndur þegar ein (af tveim!) stóru nálunum fóru í lærafellingarnar hans. Hann reyndist orðin 6,5 kg og 61 cm.

Flottir þessir drengir mínir :)

Prakkari

2010-04-30T20:58:00.000+02:00

Stundum harðneitar Valtýr að sofa langa daglúrinn sinn. Viftar bara höndunum þarna oní vagninum sínum og fer að tala við sjálfan sig þartil mamman gefst upp á að rugga honum til svefns á ný.. og tekur hann upp. Tók þessa mynd af honum í dag nýupptekin eftir örstuttan hænublund á svölunum. Grallarasvipurinn leynir sér ekki. "Sofa ? Ég ? Neeee"

P.s. hálftíma síðar steinsofnaði hann við brjóstið og svaf restina af langa daglúrnum.. í mömmufangi ;)

Kampakátur

2010-04-28T20:08:00.000+02:00

Ljúfa litla lambið okkar verður 12 vikna í vikunni. Ótrúlegt hvað tíminn er fljótur að líða. Hann er að verða alveg svakalega duglegur að nota hendurnar á sér og getur eytt löngum tíma í að seilast eftir leikföngum, opnar lófana, lokar og færir upp að munni sér í þeirri von að dótið fylgi með... tekst því miður sjaldnast en sem betur fer eru hendurnar góðar á bragðið. Svo góðar að hann er komin með snert af exemi á höndunum eftir allan hamaganginn á þeim. Og já slefsmekkirnir hafa verið teknir upp í kjölfarið ;)

Gullkorn frá Hilmi

2010-04-21T09:53:00.002+02:00

Hilmir er að rembast við að fullorðnast þessa dagana. Hálf gelgjulegt eiginlega og ekki laust við að við bæði flissum að honum og móðgumst á víxl.
Hann og bestasti vinur hans G leika mikið saman bæði á leikskólanum og svo um helgar þegar þeir vilja banka uppá hjá hvor öðrum í tíma og ótíma, borða kvöldmat saman og helst gista hjá hvor öðrum.
Hilmir hefur sjálfur tilkynnt okkur að hann elski G. Ekki elski einsog "ástfangin" og vilji giftast honum ! Neeei nei. Hann bara "elskar kroppinn á honum" (tvívíddin að virka þarna)

Svo þegar við Ingó förum á betri stað í lífinu (jájá... deyjum). Þá ætlar Hilmir að flytja heim til G og búa þar. Ég spurði hvað yrði þá um litla bróður og hann leysti það með því að fullvissa mig um að hann og G myndu sjá um Valtý. Ekkert mál ! ;)

Þess ber að nefna að ég er Begga. Kölluð Begga af eldri syni mínum. Því ég heiti Begga. Þetta með að vera mamma hans er bara aukaatriði þegar mar er fullorðin bráðum-að-verða-fimm-ára ;)

Valtýr fyrirsæta

2010-04-19T17:17:00.000+02:00

Hann er ekkert smá falleg fyrirsæta hann Valtýr. Þarna er hann 7 vikna. Það virðist vera "fyrir lööööngu síðan" (eins og Hilmir myndi orða það) enda er hann á sinni 11. viku núna ;)
Fórum í smá fyrirsætuleik ég og hann. Ekki spurning hvort okkar myndist betur ! Ætti kannski að bjóða Liberó uppá afnot af honum utaná pakkana ?

Framhaldssagan af burðarsjalinu

2010-04-12T12:43:00.001+02:00

Enn tekur burðarsjalsnotkunin á sig nýjar myndir núna þegar Valtýr er orðin stöðugri í hnakkanum og eiginlega að verða alltof stór til að láta bera sig í vöggu einsog í upphafi.

Nei nú er það upprétt sem gildir ! Ágætt þegar hann vill ekki liggja sjálfur og dunda sér heldur vera í fangi og helst á ferð. Ég get þá spásserað um heimilið og gengið frá dóti og drasli, stússast í eldhúsinu og svoleiðis meðan hann fylgist með úr hásætinu.

Svo þegar hann verður sybbin þá bara stíngur hann sér inní eina hliðina, kemur sér vel fyrir og fer að gera sig til við að sofna.

Svona til að koma í veg fyrir misskilning (nei, ég er ekki að reyna að kæfa barnið! ;)) þá vill hann helst sofna með einhvað fyrir andlitinu svo þetta er algjör draumastaður og staða fyrir hann að sofna í !

Friðsældin ein

2010-04-10T20:17:00.000+02:00

Einhverra hluta vegna þá eru börn alltaf fallegust þegar þau eru sofandi. Langfallegust !
Á þess vegna ferlega erfitt með að sjá hann í friði þegar hann liggur svona værðarlega í fanginu á mér. Eftir að hafa dáðst að honum, þefað af honum og sogið í mig friðsældina teygji ég mig í myndavélina svo ég geti borið augnablikið með mér aaaaðeins lengur. Á eftir að draga þessa fram þegar andvökunætur vegna tanntöku láta sjá sig ;)

Mannalegur

2010-04-10T20:03:00.000+02:00

Engin furða að okkur finnist hann Valtýr yndislegastur og fallegastur í heimi hér. Og nú höfum við myndasönnun ! ;)
Hann verður alveg ótrúlega mannalegur þegar hann er farin að geta haldið haus smástund, setið uppréttur og fylgst með heiminum frá nýju sjónarhorni.

Sexkílóasjarmatröllið

2010-04-08T20:00:00.001+02:00

Þegar Valtýr sér andlit tekur hann sér nokkrar sekúndur til að spekúlera, pæla, spá.. "hef ég séð þetta andlit áður?", næsta spurning í huga hans er "er andlitið brosandi?". Ef svarið við seinni spurningunni er já þá brýst fram þetta líka einlæga bros sem næstum nær allan hringinn... tja allavega uppað augum ;)

Ekki frá því að maður eigi bágt með að slíta sig frá svona sjarmerandi brosi. Enda fylgir því gjarnan smá spjallstund... Algjörlega ómetanlegt !

6 kíló á níundu viku

2010-04-07T20:37:00.003+02:00

Í dag var Valtýr tekin í smá tékk hjá lækninum í ungabarnaeftirlitinu eins og vera ber þegar börn eru að sigla í 9 vikna aldurinn. Engar athugasemdir voru gerðar annað en að þarna væri á ferð hraustur og fínn strákur með góða sprænukunnáttu (alveg einsog síðast þegar hann var settur á "mælibekkinn" þá bleytti hann bæði það, borðið og gólfið... tja.. næstum því vegginn hinummegin) !

Formlegu tölurnar uppá þyngd, lengd og höfuðummál voru skrifaðar í gulu bókina hans sem ég tók svo heim og gerði samanburð við gulu bókina hans Hilmis. Og enn fæ ég á tillfinninguna að við höfum barasta ýtt á copy-paste við framleiðsluna á Valtý; munaði innan við 100 grömmum á þyngdinni, nákvæmlega jafn langir og nákvæmlega sama höfuðummál ;)

En já, 6 kíló og 10 grömm er kappinn orðin.
Eftir mánuð verður svo 3gja mánaða skoðun með sprautu í bæði lærin *ái!*

Eigin túlkanir

2010-04-05T10:06:00.003+02:00

Hilmir á að sjálfsögðu það klassíska alíslenzka ritverk um Negrastrákana. Hefur verið lesið/sungið fyrir hann nokkrum sinnum fyrir háttinn og alltaf fer um okkur örlítill kynþáttafordómahrollur enda er þarna sungið hástöfum um kolsvarta negra sem eru það vitlausir að þeir deyja af öldrykkju einni saman, geispa þartil þeir hrökkva uppaf og sofa yfir sig af einskærri leti án þess að vakna nokkurntíman aftur.

En hreint og tært er barnshjartað. Hilmir veit ekkert hvað "negri" er enda býr hann hér í hjarta siðmenningarinnar í innflytjendaþéttu hverfi þar sem fólk í öllum regnbogans litum lifir í sátt og samlyndi.

Svo hann situr núna á gólfinu og syngur um "tíu litla MAURAstráka" ;)

Zzz

2010-03-26T09:50:00.000+01:00

Svona var hann duglegur. Kom sér sjálfur á hliðina. Náði að slengja hendinni í dótið sem er fast við leikmottuna, lá svo þarna og bakslaðist við að láta heyrast í því. En svo kláraðist orkan skyndilega... og þá er kannski best að ná sér í smá bjútísleep ?

Á stóra bróður er hægt að stóla...

2010-03-26T09:45:00.000+01:00

Hilmir hefur fundið sig í því að bera ábyrgð á að stínga snuddunni uppí litla brósann sinn. Uppsker fyrir vikið einlæga aðdáun Valtýs sem hefur ekki ennþá náð það mikillri stjórn á höndunum sínum (hvað þá fíngrunum!) til að sjá sjálfur um málið.

Og já.. litli drengurinn er rokkari í húð og hár. Rolling Stones samfella því til heiðurs ;)

Morgunspjallið

2010-03-26T09:33:00.002+01:00

Morgnarnir eru bestir hjá Valtý. Þá er hann í óhemju miklu spjall og brosstuði. Allir tónar prófaðir og liggur við að maður heyri einhvað nýtt á hverjum degi.

Öruggur

2010-03-19T11:05:00.000+01:00

Stundum þarf maður bara örugga hendi nálægt sér meðan maður er að sofna... alveg sama hvaða hendi (eða fótur!) það er ;)

Hjalarinn

2010-03-19T11:01:00.000+01:00

Valtýr er að taka þroskastökk þessa dagana. Heiðrar okkur með bæði brosi og hjali... og svo liggur hann oft í vöggunni sinni og æfir sig að ná dóti með hendinni. Rykkjóttar hreyfingar enn sem komið er en einbeitingin er í hámarki og það er ferlega gaman að fylgjast með þessum ponsulitlu-heljarskrefum frammávið í þroskanum.

Hann er annars alltaf jafn ljúfur og sáttur við lífið. Tekur stundum uppá því að sofa heilu og hálfu dagana en lætur það sem betur fer ekkert trufla nætursvefninn. Þurfum heldur ekkert að hafa fyrir honum á næturna... allavega ekki Ingó sem sefur á sínu væra við hliðina á okkur og lætur mig bara um að þjónusta matarþörf unga mannsins á þriggja til fjögurra tíma fresti.

Veikindi

2010-03-13T13:39:00.003+01:00

Hilmir er veikur. Hitalasinn. Vorkennir sjálfum sér ógurlega. Byrjaði á fimmtudagskvöldinu með smá hita sem svo hefur haldist. Mest farið uppí 40 gráður en á krakkavísu er það ekkert sem slær mann út. Hann kvartar hástöfum yfir lélegu sjónvarpsefni, leikur sér bara með Legó ef pabbi er með og lætur pína í sig fljótandi Alvedon með reglulegu millibili. Ekkert sérlega góður sjúklingur verður að segjast.

Sem betur fer er þetta sjaldgæft ástand á heimilinu. Síðast var hann veikur í ágúst 2008 !

Í þessum skrifuðu orðum er hann úti í garði með pabba sínum að sparka bollta. Neyðarúrræði eftir að boltahamagangurinn frammí forstofu var komin yfir þolanleg mörk.

5 vikna og 5 kg

2010-03-10T18:25:00.003+01:00

Litli snáði og ég fórum í ungbarnaeftirlitið í morgun. Sem betur fer var það bara hann sem fór á viktina og ekki ég (*gúlp*) og reyndist vera orðin 5,3 kg. Barnahjúkkan gerði smá stöðutékk á þroskanum hjá honum og að sjálfsögðu fékk hann fullt hús stiga í öllum flokkum. Hreyfði höfuðið sjálfur til beggja hliða, viftaði með báðum höndum, horfði djúpt í augun á henni og spjallaði smá við hana ásamt því sem hann gat fylgt eftir þegar hún færði sig.
Stórir og mikilvægir hlutir þegar maður er 5 vikna gamall ;)

Eftir skoðunina fór ég í smá búðarröllt. Bjóst við að þurfa að rjúka útúr verslunarmiðstöðinni ef hann færi að orga einhvað en litla ljósið bara sofnaði vært í vagninum og leyfði múttu sinni að bæði máta og versla eitt og annað áður en heim var haldið. Ekkert stress á þessum herramanni.

Sá eldri

2010-03-03T11:22:00.000+01:00

Hilmir uppgötvaði nýjan séríslenskan matrétt sem honum fannst bæði spennandi og góður. Grjónagrautur og slátur. Lifrapylsan var ókei en blóðmörinn var bestur. Hann nefnilega komst að því að þetta væri meinhollt "víkingakjöt" og borðaði með bestu lyst :)

Sá yngri

2010-03-03T11:02:00.001+01:00

Valtýr dafnar einsog sést á myndinni. Krúttfellingarnar aukast með hverjum degi og kúkableyjurnar líka í réttu hlutfalli við móðurmjólkurneyslu.
Mér fannst ég lengi vel nota minnstu fatastærðirnar á Hilmi (50-56) en þetta eintak krefst nú þegar stærðar 62 þannig að það er í snarhasti búið að umraða innihaldi barnafataskúffunnar. Eða kannski líður tíminn bara hraðar svona í annað sinn ?

Á kvöldin verður Valtýr dálítið mömmusjúkur. Þarf að vera nálægt matnum sínum. Rankar við sér ef ég fer í burtu lengra en 2 mínútur eða 2 metra. Þá hefur hann fengið að lúlla sér í fanginu á mér þartil ég fer sjálf uppí rúm að sofa. Í gær lagði ég hann frá mér á kodda í sófanum við hliðina á mér meðan ég hljóp og fyllti á vatnsglasið mitt. Þarna lá hann svo bara steinsofandi það sem eftir var kvölds. Sófakartafla með meiru ;)

Bless í bili amma

2010-02-28T12:06:00.000+01:00

Bugga amma búin að dvelja hjá okkur síðan á þriðjudaginn. Margnýtt í að gæta minnsta eintaksins meðan eldað er, baða stærra eintakið og lesa fyrir svefninn, sauma myrkvunargluggatjöld, prjóna sokka, laga buxur og úlpur... ja... upptalningin gæti verið löng.

En í dag var komin tími til að segja bless í bili og keyra útá flugvöll. Hilmir lýsti því yfir strax í gær að hann myndi sakna hennar og það held ég að við eigum öll eftir að gera. Nú er bara að setjast niður með dagatalið og telja dagana frammað sumri þegar við fáum smá ömmuskammt aftur (og afaskammt, frænkuskammt, systraskammt osfrv osfrv).

Bless amma og takk fyrir okkur !

3gja vikna Valtýr

2010-02-26T10:58:00.003+01:00

Í dag er föstudagur. Sem þýðir að Valtýr er þriggja vikna í dag. Hann hefur notið undanfarinna daga við að láta móðurömmu sína sem er í heimsókn frá Íslandi dáðst að sér í hvívetna, drekka móðurmjólk og sofa. Og stækka !! Já ekki má gleyma því. Hann er búin að lengjast um einn sentimeter frá fæðingu og þyngjast vel og vandlega. Búin að þyngjast svo mikið að hann er búin að hoppa upp á næstu kúrfu fyrir ofan á skipulagsvaxtaritinu hjá ungbarnaeftirlitinu. Orðin heil 4.870 grömm :) Ágætt að fá enn og aftur staðfestingu á að mömmumjólkin sé að gera gott og litli unginn að fá nægju sína (og vel það!).

Í næstu viku ætlum við að fara að vinna í því að koma einhverskonar hversdagsskipulagi á litlu fjögurra manna fjölskylduna okkar. Hilmir "má" bara vera í leikskólanum frá 9-15 meðan foreldri er í fæðingarorlofi þannig að það þarf aðeins að endurraða morgun- og eftirmiðdagsrútínum. Valtýr sefur til 9 á morgnana ef hann fær að hafa sinn háttinn á en einhvað þarf að sannfæra hann um að sofna fyrr á kvöldin svo hann geti vaknað fyrr og komið í vagnalabbitúr með okkur Hilmi á morgnana. Veit ekki alveg hvernig maður sannfærir svona lítinn kút um að hnika líkamsklukkunni sinni.... ekki þurfti ég að hafa neinar svona pælingar þegar Hilmir var lítill ;)

Myndaorgía !!!

2010-02-19T16:51:00.003+01:00

Ingó kveikti á heimasíðuperunni sinni. Já það var víst dulítið langt síðan nýjar myndir voru settar inn *hmmm*.
Svo hann vatt sér í verkið og setti saman best-of seríu fyrir árið 2008, 2009 og að sjálfsögðu "fæðingarseríuna" hans Valtýs.

Gefur allt á að líta hér á www.beogin.com.

Snuddan samþykkt

2010-02-18T13:03:00.000+01:00

Hann Valtýr var á góðri leið með að koma sér uppá lagið með að nota mig sem snuð. Ekkert að því svosem þar sem það örvar brjóstagjöfina og allt það en þegar nætursvefninn skerðist niður í nánast ekki neitt því að lítil vera vill vera með einhvað uppí sér (og það ekki til að nærast!)... þá var mér hætt að lítast á blikuna.
Svo eftir skylduferðina í ungbarnaeftirlitið í gær þar sem staðfest var að kappinn litli væri búin að þyngjast vel og vandlega undanfarna dagana ákváðum við að byrja dudduþjálfunina samdægurs.

Og hann tók í fyrsta ! Trúði því varla sjálf en svoleiðis súpersáttur Valtýr sem lá í fanginu á mér og malaði með silkisílikontúttuna uppí sér (sjá mynd). Nóttin var líka töluvert betri en þær undanförnu. Bara tvisvar sem ég þurfti að svara kalli til næringar og restina tók duddan að sér ;)

Fyrsta barnavagnaferðin

2010-02-16T18:35:00.001+01:00

Loksins loksins gátum við drifið okkur út í smá göngutúr með litla peðið í vagni. Búið að vera svo fallegt vetrarveður undanfarnar vikur og ferlega súrt að hanga inni allan liðlangan daginn. Ástæðan hefur verið barnavagnaleysi en í gærkvöldi leystum við einfaldlega málið, keyptum notaðan vagn á Blocket og þurfum þá ekki lengur að pirra okkur á hversu svifaseinir DHL eru.

Valtýr brást annars voða vel við þessu nýja svefnplássi sínu. Var sofnaður í lyftunni á leiðinni niður og rumskaði ekki einusinni þar sem vagninn skoppaði um í snjófærðinni. Við létum okkur nægja lítinn hring svona til að byrja með en eigum örugglega eftir að ná að grandskoða nærliggjandi göngustíga á komandi mánuðum. Hlakka bara mest til að fá vorið beint í æð ! ;)

Upprennandi burðarpokabarn ?

2010-02-14T13:09:00.000+01:00

Hafandi reynsluna af því að hafa margnotað og ofnotað BabyBjörn burðarbeisli ákváðum við í þetta skiptið að prófa einhvað annað. Í burðarpoka/sjala frumskóginum eru til endalausir valmöguleikar og ákváðum við að prófa þetta einfalda Tri-Cotti teygjusjal sem er algjörlega imba- og aulahelt. Bara svippa því á sig og troða krakkanum inní. Og þar býr hann einsog lirfa í eggi... eða barn í móðurkviði réttara sagt ;) Frammað tveggja mánaða aldri verður þetta eina stellingin sem er í boði (sjá mynd). Sjáum til hversu lengi þetta verður vinsælt...

Þyngdaraukningar

2010-02-12T15:14:00.002+01:00

Velmegunarmæling á ungabörnum er fyrst og fremst mæld í grömmum. Þyngdargrömmum. Þetta erum við einstaklega meðvituð um eftir að hafa komið Hilmi á legg með tilheyrandi áhyggjum, þurrmjólkurábótum og snemmbúnu grautarsulli vegna lítillrar þyngdaraukningar.

Valtýr byrjar allavega á öðrum tónstiga en bróðirinn. Fyrir það fyrsta var hann þyngri við fæðingu og svo núna viku síðar er hann búin að ná upp fæðingarþyngdinni og heilum 100 grömmum betur en það ! 4.180 gr mældist hann hjá ungbarnahjúkkunni sem kom í heimsókn til okkar í dag. Hún staðfesti líka hversu óskaplega fallegur og fínn hann væri... ekkert að efast um semsagt ;)

Tveir gullmolar

2010-02-11T10:53:00.000+01:00

Ein vinsælasta spurning sem brennur á vörum vina og vandamanna þegar innt er eftir fréttum af okkur nýstækkuðu fjölskyldunni er "hvernig tekur Hilmir svo bróður sínum?".
Svarið er; með miklum kærleika og forvitni.

Miðað við pínulitla og viðkvæma litla einstaklingin virðist Hilmir stór og klaufalegur. Það þarf mikið að minna hann á að fara varlega og passa hvar hann er með olnboga og hné... þetta minnir dálítið á karakterinn Lenny í myndinni "Of Mice and Men".. ("Eeeeaassy there Lenny"). Hann vill bæði knúsa, kyssa og klappa í heitfengum kærleiksbrima að það er stundum erfitt að ráða við það enda er hann nú bara 4 ára þessi stóri stóri bróðir :)

En allt kemur þetta frá góðum stað og stóru hjarta sem á örugglega eftir að reynast þessari litlu veru vel í framtíðinni.

Litlu lappirnar

2010-02-09T13:26:00.000+01:00

Valtýr er með ofursæta og dáldið spes fætur. Pínu krumpaðir og svo blakar hann þeim alla leiðina aftur að fótlegg. Eins og froskur eða baksundsfótatak hjá keppnismanni ;)
Barnalæknirinn sagði þetta ekkert til að hafa áhyggjur af og myndi lagast af sjálfu sér á komandi mánuðum... Á meðan dáumst við bara að þessu...